Notkunarskilmálar

1. Þjónustan

Slapp Work er lokaður samskiptavettvangur fyrir starfsfólk: fréttaveita, hópar, tilkynningar, spjall, viðburðir, starfsmannaskrá, skipurit og þekkingarsafn, auk stjórnborðs fyrir stjórnendur. Hvaða eiginleikar eru í boði ræðst af áskriftarleið viðskiptavinar.

Þjónustan er eingöngu seld fyrirtækjum, stofnunum og félögum til nota fyrir starfsfólk sitt og samstarfsaðila. Hún er ekki ætluð einstaklingum til einkanota.

2. Aðgangur og notendur

• Sá sem stofnar fyrirtæki í Slapp Work verður eigandi þess og staðfestir að hann hafi umboð til að skuldbinda viðskiptavin samkvæmt skilmálunum.
• Stjórnendur viðskiptavinar ráða hverjir fá aðgang (með boði, boðskóða, staðfestu léni, einskráningu eða notendaskrá) og bera ábyrgð á að aðgangi sé lokað þegar fólk hættir.
• Notendur bera ábyrgð á að gæta lykilorða og innskráningarleiða. Viðskiptavinur skal tilkynna okkur án tafar ef grunur er um óheimilan aðgang.
• Viðskiptavinur ber ábyrgð á að notendur hans fari eftir þessum skilmálum.

3. Prufutími

Nýtt fyrirtæki fær 14 daga prufutíma án endurgjalds og án greiðsluupplýsinga. Að prufutíma loknum lokast aðgangur starfsfólks þar til stjórnandi velur áskriftarleið. Efni glatast ekki við það og opnast aftur um leið og áskrift er virk. Ekki er boðið upp á ókeypis áskriftarleið.

4. Áskriftir og verð

• Hver áskriftarleið hefur mánaðarlegt grunnverð sem inniheldur tiltekinn fjölda virkra starfsmanna, auk verðs fyrir hvern virkan starfsmann umfram það. Gildandi verð og innihald leiða koma fram í stjórnborði (Stjórnborð → Áskrift).
• Virkur starfsmaður er notandi með virkan aðgang að fyrirtækinu. Fjöldinn uppfærist sjálfkrafa þegar fólk bætist við eða er gert óvirkt og mismunur innan tímabils er reiknaður hlutfallslega.
• Greitt er fyrirfram, mánaðarlega eða árlega. Árleg greiðsla er á lægra verði. Skipt er á milli mánaðarlegrar og árlegrar greiðslu við næstu endurnýjun.
• Öll verð eru án virðisaukaskatts. Virðisaukaskattur leggst á eftir því sem lög kveða á um. Þegar greitt er í gegnum Polar (sjá 5. gr.) gerir viðskiptavinur með íslenskt virðisaukaskattsnúmer sjálfur skil á virðisaukaskatti vegna kaupanna (öfug skattskylda) í samræmi við lög nr. 50/1988.
• Við getum breytt verðum með minnst 30 daga fyrirvara. Breyting tekur gildi við næstu endurnýjun eftir að fyrirvarinn er liðinn. Hafi viðskiptavinur samið um fast verð í skriflegum samningi gildir það út samningstímann.

5. Greiðslur

Grunnur og Pro

Greitt er með korti í gegnum Polar Software, Inc. („Polar“), sem er endursöluaðili okkar og söluaðili (e. merchant of record) gagnvart viðskiptavini. Polar gefur út reikninga, innheimtir greiðslur og skatta og um greiðsluna gilda jafnframt kaupskilmálar Polar. Við geymum ekki kortaupplýsingar. Stjórnendur geta séð reikninga og breytt greiðsluupplýsingum í Stjórnborð → Áskrift.

Enterprise

Enterprise-áskriftir eru gerðar með skriflegum samningi og greiddar gegn reikningi frá Vestra AI ehf. með kröfu í netbanka. Gjalddagi er 14 dögum eftir útgáfudag reiknings nema um annað sé samið. Um dráttarvexti fer samkvæmt lögum nr. 38/2001.

Vanskil

Mistakist greiðsla reynir Polar aftur í nokkra daga og stjórnendur fá tilkynningu. Takist greiðsla ekki lokast aðgangur starfsfólks þar til greitt hefur verið. Efni viðskiptavinar er varðveitt í samræmi við 11. gr.

6. Uppsögn

• Viðskiptavinur getur sagt upp áskrift hvenær sem er í stjórnborði. Uppsögn tekur gildi í lok greidds tímabils og aðgangur helst opinn þangað til.
• Greidd tímabil eru ekki endurgreidd nema lög kveði á um annað eða við höfum brotið gegn skilmálunum með verulegum hætti.
• Enterprise-samningar eru uppsegjanlegir eins og um er samið í þeim. Sé ekki um annað samið endurnýjast þeir um eitt ár í senn nema þeim sé sagt upp með 30 daga fyrirvara fyrir lok samningstíma.
• Við getum lokað aðgangi án fyrirvara ef viðskiptavinur eða notendur hans brjóta verulega gegn 7. gr. og getum sagt upp þjónustunni með 90 daga fyrirvara af öðrum ástæðum. Í síðara tilvikinu endurgreiðum við ónotaðan hluta greidds tímabils.

7. Notkunarreglur

Óheimilt er að nota Slapp Work til að:

• birta eða dreifa efni sem er ólöglegt, meiðandi, felur í sér áreitni eða hatursorðræðu, eða brýtur á réttindum annarra;
• dreifa spilliforritum, ruslpósti eða reyna að komast í kerfi eða gögn sem viðkomandi hefur ekki heimild til;
• trufla rekstur þjónustunnar, álagsprófa hana eða sniðganga takmarkanir á aðgangi eða áskriftarleiðum;
• afrita, bakþýða eða endurselja þjónustuna eða nota hana til að smíða samkeppnisvöru.

Stjórnendur viðskiptavinar geta fjarlægt efni og lokað aðgangi notenda. Við getum fjarlægt efni sem brýtur augljóslega gegn lögum eða þessum reglum.

8. Efni og gögn viðskiptavinar

• Viðskiptavinur og notendur hans eiga það efni sem þeir setja inn (færslur, athugasemdir, skilaboð, skrár og myndir). Við fáum einungis þau réttindi yfir efninu sem þarf til að veita þjónustuna.
• Við vinnum persónuupplýsingar í efni viðskiptavinar sem vinnsluaðili fyrir hans hönd samkvæmt vinnslusamningi, sem er hluti af skilmálunum. Um vinnslu okkar sem ábyrgðaraðila fer samkvæmt persónuverndarstefnu.
• Við notum ekki efni viðskiptavinar til auglýsinga, seljum það ekki og notum það ekki til að þjálfa gervigreindarlíkön.

9. Réttindi okkar

Slapp Work, hugbúnaðurinn, vörumerki og hönnun eru eign Vestra AI ehf.. Viðskiptavinur fær á áskriftartímanum óframseljanlegan og almennan rétt til að nota þjónustuna fyrir eigin starfsemi. Ábendingar sem okkur berast um þjónustuna megum við nýta án endurgjalds.

10. Rekstur og breytingar

• Við kappkostum að þjónustan sé aðgengileg allan sólarhringinn en ábyrgjumst ekki að hún sé alltaf án truflana, nema um uppitíma sé samið í Enterprise-samningi. Fyrirhugað viðhald er tilkynnt með fyrirvara þegar hægt er.
• Við þróum þjónustuna stöðugt og getum breytt eiginleikum. Við fjarlægjum ekki eiginleika sem skipta viðskiptavin verulegu máli á greiddu tímabili án þess að bjóða sambærilega lausn eða hlutfallslega endurgreiðslu.
• Farsímaforritin eru sótt í App Store og Google Play og um þau gilda jafnframt skilmálar þeirra verslana.

11. Gögn við lok viðskipta

Eftir að áskrift lýkur eða prufutíma lýkur án áskriftar varðveitum við gögn viðskiptavinar í 90 daga svo hægt sé að halda áfram eða óska eftir afriti. Að þeim tíma liðnum er gögnunum eytt, nema lög krefjist lengri varðveislu. Afrit í öryggisafritum eyðast innan 30 daga þar á eftir. Viðskiptavinur getur óskað eftir fyrri eyðingu með tölvupósti á vestra@vestra.is.

12. Ábyrgð

• Þjónustan er veitt „eins og hún er“. Við berum ekki ábyrgð á óbeinu tjóni, svo sem rekstrartapi, glötuðum hagnaði eða tjóni vegna gagnataps sem rekja má til notkunar viðskiptavinar.
• Heildarábyrgð okkar vegna þjónustunnar takmarkast við fjárhæð sem viðskiptavinur hefur greitt fyrir hana síðustu 12 mánuði áður en tjónsatburður varð.
• Takmarkanirnar gilda ekki um tjón sem valdið er af ásetningi eða stórfelldu gáleysi.
• Hvorugur aðili ber ábyrgð á vanefndum sem stafa af atvikum sem hann ræður ekki við (force majeure), svo sem náttúruhamförum, netárásum eða bilunum hjá þriðju aðilum sem ekki mátti sjá fyrir.

13. Trúnaður

Aðilar skulu gæta trúnaðar um upplýsingar sem þeir fá frá hvor öðrum og merktar eru trúnaðarmál eða eru augljóslega trúnaðarmál, þar á meðal efni viðskiptavinar. Trúnaðarskyldan helst eftir að viðskiptum lýkur.

14. Breytingar á skilmálum

Við getum breytt skilmálunum. Verulegar breytingar eru tilkynntar stjórnendum með minnst 30 daga fyrirvara. Haldi viðskiptavinur áfram notkun eftir að breyting tekur gildi telst hann hafa samþykkt hana. Skriflegir Enterprise-samningar ganga framar skilmálunum að því marki sem þeir víkja frá þeim.

15. Lög og varnarþing

Um skilmálana gilda íslensk lög. Rísi ágreiningur sem ekki leysist með samkomulagi skal reka mál fyrir Héraðsdómi Reykjavíkur.

16. Hafa samband

Vestra AI ehf., Bolholt 8, 105 Reykjavík. Netfang: vestra@vestra.is.